Ruma Jabatan dan Ruma Sakit

Laporan Wartawan Pos Kupang.Com, Ferry Ndoen

BAI Ndu masi pagi buta su dudu angkat kaki di teras ruma sambil baca ame koran Pos Kupang yang diantar loper koran. Sambil masko kopi panas deng kodo ame kue koki holo pana lodo panas panas, Bai Ndu baca kas dengar ame sam Ina Feok

kalo itu ruma jabatan walikota su mulai rusak.
"Memang... sa ruma kalo orang sonde tinggal pasti sa rusak.. Ya kalo perlu iperbaiki na perbaiki to... asal jang sampe uang untuk perbaiki ruma jabatan mulai ada yang neko-neko laii kow," kata Ina Feok.

Bai Ndu inga kalo ruma jabatan walikota yang rusak tuh.. ruma jabatan yang baru di bangun dan usianya balom talalu lama. Dibangun sakitar lima taon lalu.

"Ada ruma jabatan yang bae di Pasir Panjang tapi pamarinta su bangun rujab baru lai... bet son mangarti ini pamarinta ni dong pung otak isi apa sa.. Mestinya ruma jabatan yang lama di Kelurahan Pasir Panjang bisa diperbaiki ko ditempati, tapi su buat laii ruma jabatan baru tapi sakarang su mulai rusak.

Beta ju mau kasi conto ril di Kota Kupang su ada banya ruma sakit, ada RSU Prof WZ Johannes, RS Pendidikan Undana, RST Wirasakti, RS Bhayangkara, tapi sakarang gedung RSU SK Lerik su mau di bangun tamba besar laiii.

Lebe bae itu doi di pake untuk dorong gizi masarakat yang lebe baeee..ko masarakat bisa sehat dan jang sakit sakit... Padahal Puskesmas Rawat Inap Pasir Panjang ju masi bisa dan mampu tampung serta layani untuk opname pasien. Masi ada banya ruang kosong.... tapi ini pemikir dan perencana di pamarinta ini dong pung otak cum mental paroyek sa... kapala otak cum mau bangun dan bangun... Kalo suru pelihara su malas karena doii kici ana dibanding kalo bangun baru yang bisa telan dana sampe puluan hingga ratusan miliar rupiah ni. Ini bekin konotasi dan dugaan masarakat jadi negatif terhadap pembangunan," kata Bai Ndu.

Ina Feok dengar ame Bai Ndu pung carita....., dia katawa lebar karna dia tau ada aparatur pamarinta yang karja pake hati... tapi ada ju aparatur pemerinta yang karja suka neko neko dan suka KKN.

" Ya... skarang kalo barani karja KKN pasti akan kena hiki karna masarakat ju su pintar dan bisa langsung lapor kasus KKN ke Komisi Pemberantasan Korupsi," kata Ina Feok.

Dua orang ini baomong taputra sana taputar sini, soal ruma jabatan sampe ruma sakit akhirnya dong noeee sandiri.
"Dari pada baomong banya lebe bae kataong masko koki holo pana lodo deng kopi panas do," kata Bai Ndu (ferry ndoen)