Su Mulai Berubah

AMA Tobo su mabok berat. Bai Ndu yang jadi bandar maen kotor na. Ama Tobo dua kali, Bai Ndu baru satu kali. Itu ju baitua maen po'a kas Ama Tobo flak na. Bai Ndu pung di panta mok sa. Ama Tobo talepo di dadegu dekat pohon carmelek. Bai Ndu dudu di rebis. Tau to, kalu dong dua su bakumpul pasti ceret deng mok su ada.

Tenga malam baru Bai Ndu pulang di rumah. Ama Tobo su matono di atas dadegu. Fafudek dong kaluar dari mulut. Su sonde sadar lai. Bai Ndu jalan tagoyang-tagoyang. Sampe tenga utan deka ruma, Bai Ndu nae katumu buntianak. Lampu jalan sonde ada ko galap stenga mati. Mau lari su sonde bisa lai.

Bai Ndu badiri gamatar. Calana su basa. Kincing malele ko su turun sampe betis. Ontong sa Bai Ndu masi sadar sadiki. Baitua mulai bardoa. Dia ingat pandeta itu kapan pas natal bilang, kalau mau selamat mus bardoa. Giliran mau doa, Bai Ndu sonde tau mao omong apa.
Terpaksa baitua doa makan sa. Itu sa yang dia hafal. Mungkin karna su terbiasa, campor lai deng mabok, ais doa, Bai Ndu langsung bilang, "permis makan." Buntianak tahedek memang. "Ini orang mau makan beta ko?

Bai Ndu memang su mulai berubah. Ini taon, baitua sonde pernah alpa gareja. Su mulai jadi majelis na. Ama Tobo olok baitua trus.

"Bu jang panas-panas tai ayam. Baru perhadapan abis, jadi semangat. Su dua tiga bulan, foe ulang. Tapi beta harap bu mulai berubah dari sekarang su. Buntianak sa, su mulai takut dengan bu tu." (sipri seko)