Pohon Trang Pohon Natal

Laporan Wartawan Pos Kupang.Com, Ferry Ndoen

SAKARANG ni pohon trang ato pohon natal su dipasang di beberapa tampat di wilaya Kot Kupang.

"Coba ko lu jalan tapaleuk ame di beberapa sudut diKot Kupang... beberapa pohon trang ato pohon natal su dipasang sperei di depan Gareja Kuanino, di depan ruma jabatan gubernur dan sejumlah gareja ju su pasang ame pohon trang," kata Ina Feok bacara deng Bai Ndu.

Kalo Ina Feok suka baomong pohon trang, Bai Ndu lebe suka baomong soal kue natal.

"Lu baomong soal pohon trang... kalo beta lebe suka bomong soe kokis natal. Biasanya kalo natal, katong bisa makan kokis karing pung anak, lai... ada kokis karing jenis nastar, putri salJu, kokis karing isi salei, kokis karing lapis keju. Apala lai kue basa, mulai dari tar susu, lapis surabaya, kue bronis, lapis legit, kue zebra," kata Bai Ndu panjang lebar.

Ina Feok dengar Bai Ndu baomong di katawa sampe pegang parut..

"Lu bisa hafal ame janis kue... ini pasti lu tukang makan kue woww...

"Kalo beta suka makan camilan yang di meja.. bet suka makan kacang goreng, emping malinjo. Kalo kue kue beta son talalu suka. Itu kacang malinjo deng kacang goreng kalo minum deng bir... adu pung enak lai," kata Ina Feok.
Bai Ndu katawa lebar...

"Nadi ee... kalo hari bae natal dan taon baru... biasa di satiap ruma pasti di meja ada kue enak enak.... tinggal kuat makan sa... nanti bulan januari timbang badan pasti ada kenaikan barat badan," kata Bai Ndu.

Ina Feok bilang... inga hidop ni cum satu kali sa... jadi kalo ada makan ya... makannn.. hidop nihhh..dinikmati saja.

"Toh makan ju pasti akan mati. Son makan laii pasti mati. Jadi lebe bae makan saa," canda Ina Feok

Bai Ndu dengar Ina Feok pung bakalar, dia cum bisa pukul testa.

"Ya... itu namanya hidup... jadi katong musti menikmati sa... tapi andia ju ukur ukur sadiki supaya jang mati talalu cepat. Bole makan tapi inga kow... ukur ukur sadiki nanti orang bilang katong rakuss," kata Bai Ndu kas inga.

Ina Feok son mau kalahhh.. "Yang panting katong makan kas abis...... jang buang buang makanan. Itu yang pasti orang son suka. Karna ada orang yang biasa ame banya banya... tapi dia sonde makan tapi itu makanan dia buang- buang.

Ada yang ame tapi son kuat makan dan cuma makan satenga sa... yang lain dia buang. Ini yang pasti orang son suka. Kalo katong kuat ame itu makanan harus kas abis," kata Ina Feok.

Tapi Inga... natal tuh bukan liat makan-minum semata tapi harus lahir baru.. Jang cuma ruma cet baru, bekin kue natal enak-enak tapi hati son barisi. (ferry ndoen)