Panas dan Ujan Berkat

Laporan Wartawan Pos Kupang. Com, Ferry Ndoen

BANYA orang bilang kalo mau intip neraka na datang maen ke Kot Kupang. Nanti bisa rasa karna panas matahari pung menyengat su sama ke naraka saaaa...

Bai Ndu su angka topi pembicaraan deng Ina Feok. Dong dua sambil baomong na masko kopi panas deng makan kue ubi Nuabosi goreng yang dong beli di Pasar Inpres, Pasar kasih di Naikoten I Kot Kupang...

Ina tiba tiba katawa sandiri sama ke orang gila... Bai Ndu ju ikot taheran heran.

"Beta liat lua tiba tiba katawa sandiri... ada ngalamun apa kow tiba tiba sa su katawa sandiri sandir... jang sampe su stegi alias satenga gila," kata Bai Ndu.
Ina Feok kambali katawa....

"Beta katawa karna inga ame ini orang koepang pung mangomek deng pung baomong ame laiii.....kalo panas na dong samua batareak ame... awwwiii in Kota Kupang su sama ke naraka sa.. Udara pung panas mow mati saaa....Tapi kalo ujan ju na bukannya dong sanang ko tarima kasi tapi samaaa... sa.

Masarakat Kot Kupang ju ikut mangomel... kanapa kow ujan laiii na... jalan su babecek.. na. Katong son bisa bajalan enak karna ujan," kata Ina Feok sadiki parotes.

Bai Ndu takuju Ina Feok pung baomong.. Itu su bet baru baru pi baja pi Kot Bandung, Kota Lagenda.... di sana banya orang ju basindir... dong bilang kalo mau tes naraka pung panas na coba jalan jala sa ke Kupang... "Apalaiii di Kota Kembang tuh... kota sajuk dan kota agak dingin.... son ada ujan angin ju kadang ujan na.... amper ke ujan son ada musim di sana," kata Bai Ndu.
Ina Feok katawa dengar ame Bai Ndu pung baomong...

"Itu su.. lu tagal baru pulang pasiar dari Kota Lagenda, Kot Bandung sa... na makan puji mow mati... Tapiii... beta sanang ang... ini hari tiba tiba sa Kot Kupang ujan basar.... lumayan amper dua jam ujan son tau stop....padahal dari pagi sampe jam dua balasa lewat... tuh in udara pung panas mow mati saaa.... tapi tiba tiba turun ujan. Ini nama panas panas tapi tiba tiba turun ujan berkat," kata Ina Feok.

Bai Ndu ju bardoa kalo bisa na ... ujan mulai turun marata dan stabil su biar kow katong jang sama di naraka. "Apalai ini mata aer di Kota Kupang ampe samua su mau karing. Lama lama katong mandi dan cebo panta pake batu," kata Bai Ndu. (ferry ndoen).