Polisi Kawan Masarakat

Laporan Wartawan Pos Kupang.Com, Ferry Ndoen

POS KUPANG.COM, KUPANG - MASI pagi glap buta tapi BAI Ndu su mandi ko pakean necis. Dia pake pakean open jas dan calana hitam komprang gaya tempoeo doloe. Dia masko kopi panas sambil dudu di teras tunggu Ina Feok.

"Bet su tunggu lu dar pag pagi ko kotong dua telepon taksi Gogo ko mo pi Polda NTT ikot upacara HUT Bhayangkara. Kalo lu talat sadiki bet su jalan na.... bet son mau tarlambat. Lu tau to... kalo upacara TNI ato Polri tu pas waktu na... bunyi teng pas waktu su mulai upacara. Jadi katong jalan su," kata Bai Ndu sambil tarek ame Ina Feok naek taksi.

Di sepanjang jalan dong dua asik bacara tentang polisi pung bae deng son bae.

"Sabanarnya tugas polisi itu sebage pelindung dan pengayom masarakat. Tapi masi ada oknum polisi yang suka barmaen kasus. Bet dengar ame... ada kasus di Rote sana... ada saksi korban yang sapinya ilang mala dijadikan tersangka ole polisi.

Ini karna ada oknum polisi yang barmain kasus. Dia ternyata ju bakawan dengn tukang pancuri sehingga dia maen bolak balek barita acara pemeriksanaan (BAP) kasus yang saksi korban yang sapi ilang dia jadikan tersangka dan yang pancuri yang musti jadi tersangka dijadikan saksi. Tapi itu carita dulu yang sampe sakarang masi jadi bahan pembicaraan hangat dan slalu diingat masarakat di Rote," kata Bai Ndu sadiki bacarita kas dengar Ina feok.

Ina Feok ju son mau kala...."It cum ula oknum polisi sa... Tapi memang... biasanya karna nila satu tetes bekin susu satu balanga jadi rusak.... karna ulah satu oknum polisi bekin nama korps polisi jadi rusak... Ini memang susaaahh ee.. Jadi polisi musti benar benar jaga citra... jang coba coba kasi sakit hati masarakat.

Apalai... calon Kapolri Jenderal Tito Karnavian su wanti-wanti akan menindak polisi yang masih suka barmain kasus atao suka membuat kriminalisasi orang," kata Ina Feok.

Dong dua asik baomong te.. pa sopir su barenti... "Bapa mama su sampe di Polda NTT... itu su bunyi tarompet su mo mulai upacara," kata sopir.

Bai Ndu dan Ina Feok takuju ko turun dari oto ko langsung pi duduk di karosi undangan untuk toko masarakat. "Semoga deng Hari Bae Korsp Polisi... dong pung anggota makin solid jaga kekompakan deng sonde lai bekin sakit hati masarakat karna polisi lahir dari rahim masarakat, dan polisi ada karna masarakat," bisik Bai Ndu. (ferry ndoen)