Jaksa Tuntut Jaksa

MANTAN jaksa yang su duduk di karosi pesakitan dan su jadi terdakwa di Pengadilan Negri Kupang dituntut juniornya sesama jaksa terkait kasus dugaan korupsi aset PT Sagared.

"Ini namanya jeruk makan jeruk. Hukum son kanal kawan tapi semua orang sama di mata hukum... Kasian eeee. jaksa yunior terpaksa tuntut ame dia pung senior yang perna jadi dia pung atasan di Kejaksaaan Tinggi eN Te Te. Ya... itulah hukum," kata Bai Ndu kas dengar sam Ina Feok barita di koran Pos Kupang terbitan kamaren.

Ina Feok dengar Bai Ndu pung baomong dia cum bisa katawa saa....

"Bet ju jadi heraaannn... ee. Kanapa kow it bapa tua yang tau hukum dan su jadi jaksa sanior sampe su pensiun kow bisa berbuat melanggar atoran hukum. Namanya aset negara tuhh... yang bet tau kalo mau dijual harus di lelang oleh lembaga yang berwenang. Bukan sama ke jual sayor di pasar. Ada barang sitaaan na... ko tenga pi tawar orang di jalan ko jual sa... Ini namanya menyalahi prosedur aturan dan melanggar hukum," kata Ina Feok.

Bai Ndu dengar Ina Feok baomong banya..dia cum bilang... "Lu sama ke mangarti hukum saaa... sakola ju cum satenga satenga S1 sampe S3 alias SD sampe SMA sa ma bekin diri sama ke doktor benaran ato S3...Kalo beta na sakola sampe dapa gelar eS lilin karna itu gelar paleng enak dan rasanya manis. Juga dapa gelar eS teler karena suka minum mabok," kata Bai Ndu sambil katawa. (ferry ndoen)