Di eN Te Te Korupsi Dar Daon Sampe Akar

POS KUPANG.COM, KUPANG - Daera Nusa Tenggara Timur dapat tambahan predikat baru dan julukan baru yang bekin hati rakyat Flobamora tamba ancor dan bekin menyayat hati.

"EN Te Te dari dulu suka kena olok deng istila Nanti Tuhan Tolong. Juga dapat istila keren yang agak menghibur deng istila Nasib Tidak Tentu. Masarakat provinsi laen ju suka kasi stigma tambahan deng provinsi miskin. Na sakarang su dapat tambahan baru eN Te Te sebage provinsi terkorup nomor ampat di Indonesa," kata Bai Ndu sambil kas baca Ina Feok judul barita koran yang muncul di Harian Pagi Pos Kupang akhir bulan april taon 2016 lalu , koran yang dicintai masarakat eN Te Te.

"Bet su tau.... Lu kalo datang pag-pagi hari ni pasti sangaja mo kas baca bet koran sekalian ko mo minta jata minum kopi. Bet lia lu pung otak ni brilian tapi slalu sa ada U dibali Be ato ada udang dibalik batu," kata Ina Feok sambil kas kaluar kopi panas.
Bai Ndu cum katawa lepassss.... karna dia su tau kalo Ina Feok musti baganggu deng dia.

"In judul di Koran Pos Kupang bet kira son luar biasa ju. Karna korupsi ni su dimulai sejak proyek tu direncanakan di bagian perencanaan ato dibagan bina program. Jadi bukan su tender ato su karja fisik baru orang mulai pancuri atao korupsi it spek fisik pekerjaan yang su di tandatangani kontraktor saat dong pi tanda tangan kontrak," kata Bai Ndu.

Ina Feok ju takuju...."Ohhh... jadi awal korupsi tu su mulai Ka Ka eN (KKN) saat utak-atik di bidang perencanaan kow..??? Awwwiii.... It berarti penentuan lokasi kerja ju su mulai pi lobi san-sini supaya kow ada paket yang bisa masok di lintasan ato bisa masok di dia pung wilaya ato ke lokasi yang ada kontraktor pung alat barat deng ada kuari galian c.

In ju su mulai babanting doiiii. It kontraktor dong su ceke ame it staf di bagian perencanaan kow buat paket proyek di dong pung lokasi yang ada stan by alat berat dan dekat kuari," tanya Ina Feok.

Bai Ndu katawa lepaasss..... "Ya... tapi yang Ke Ka eN sejak awal bagini aparat KPK dan polisi tipikor serta jaksa sangaja tutup mata dan tutup talinga kowww.... Dong lebe suka tepa di tenga jalan saat paroyek su karja lalu mulai cari kontraktor pung sala... mulai cari kekurangan spek di lapangan kow mulai perkarakan in kontraktor. Sabanarnya kalo mow jeli... dari awal perencanaan it sa su mulai nego san-sini ko mulai KKN. Ini ju bagian dari korupsi karna nego awal sa mitra karja su babanting doiiiii kow su rugi. Nanti karja paroyek kow mulai sulap sana sini bekin fisik paroyek kow bisa tutup doiiii yang mengalir son tentu ara untuk lobi paroyek," kata Bai Ndsambil katawa.

Ina Feok ju jadi mangarti.... Ohhhh... jadi ini korupsi bukan cuma di batang sa... ternyata dari daon sampe di akar ju menggurita eeeeehhh.. (ferry ndoen)