Pick Up Buat Angkut Barang

POS KUPANG.COM, KUPANG -  BETA lia ada puluan sopir angkot yang ada aksi demo kaliling pi De Pe eR De deng pi Kantor Dinas Perhubungan eN Te Te. Dong pi batanya kanapa ko son bole masok beroperasi di wilaya Kot Kupang.

Ina Feok baca ame sadiki judul barita di halaman Koran Pagi Pos Kupang, korannya orang eN Te Te.... dia langsung pi bacarita deng Bai Ndu.

"Beta ju ada dengar di radio kalo sopir oto pick up yang biasa bawa barang deng manusia dari wilaya pinggiran Kot Kupang, seperti dari Tarus, Naioni, Oesao... dong ada datang parotes deng pemerintah di kota," kata Bai Ndu.
Ina Feok pung dahi bakarut karna dia mangarti sadikit sa soal kebijakan ato soal aturan maen.

"Kalo menurut beta.... ini pemilik oto pick up dong ju musti tau diri dan sadar diri ko kanapa sampe pamerinta larang ame sam dong kow sonde bisa masok beroperasi resmi di ruas jalan dalam wilaya Kot Kupang. Partama dari segi aturan memang oto pick up itu di buat dari pabrik khusus memang untuk angkut barang, dan bukan untuk angkut penumpang.

Biar mau dimodifikasi karmana ju ko mau bekin jadi oto penumpang untuk bisa angkut manusia dan batang itu tetap sala dan melanggar aturan. Karna memang sonde memuhi syarat dari segi aturan. Yang namanya oto pick up cum bole muat barang dan sonde bole muat penumpang. Nanti kalo Dinas

Perhubungan kasi ijin, polisi bisa tahan itu pick up yang muat panumpang karena berisko tinggi bagi penumpang kalo terjadi kecelakaan," kata Ina Feok.

Bai Ndu dengar ame Ina feok pung baomong dia cum katawa lebar.

"Luuu... kalo soal baomong memang sangat tajam se tajam silet. Bet akui lu pung otak memang encer sama ke lu pung muka yang imut-imut. Bet ju satuju deng lu pung omong.... karna memang sala kalo oto pick up pake angkut manusia. Itu memang oto untuk angkut barang. Jadi kalo pemerinta kasi ijin maka itu ju nanti pamarintah melanggar peraturan lai," pungkas Bai Ndu. (ferry ndoen)