Motor Ilang

SAKARANG ni samua orang bagatal mau nae motor. Anak kici sampe orang tua, samua mau nae motor. Dolo kalu ada yang nae motor, itu dia paling hebat su. Ma sakarang ni, sapa sa su bisa nae motor.

Motor dalam kota su tasiram ke mir. Jalan macet di mana-mana. Jalan ko tanganga na motor dong lari nae sang kitong. Itu anak ojek dong ada yang nae motor dudu masih miring-miring ma lari di jalan raya makamiung. Su ke Rossi sa.

Ama Tobo hanya goyang kapala sa. Gara-gara bagatal nae motor, semua mau ada motor. Ada yang beli, ada yang karedit. Ada ju yang pinjam basodara dong punya. Nae-nae tahan ais itu kas kembali. Ma ada ju yang na'ok.

Motor ilang ni tiap hari ada sa na. Paling sadikit tiap hari ada tiga motor yang ilang na. Dong pi lapor di polisi ma sama sa. Sonde ada yang kena hiki. Lebe banya yang ilang sampe sakarang. Ko dong farmak ini motor dong menit sa na. Ilang sakarang warna itam, satu jam lai lu katumu di jalan sonde kenal lai tu merah na.

"Andia bagini su. Pancuri di mana-mana. Kitong pung tidor sonde sonu lai. Simpan dalam ruma ju dong hela bawa na. Beta nae katumu satu, papoko sampe tulang rebis dong noe buang."
Ama Tobo mengamok sandiri. Baitua heran ko ini motor dong maen ilang tarus ni, sonde ada satu ju yang kana hiki.

"Mus papoko sa. Tangkap ko kas masok bui satu bulan kaluar mau beken apa. Lebe bae pegang pukul kas pata dia pung kaki, ko ais itu na taku memang. Sonde bole kas ampun dong na."

"Kitong ruma su kici ana lai, malam-malam mus basesak deng motor dong. Tau lai ni." (sipri seko)