INA Feok ada kakadok mati ko dia pung laki, Ama Tobo masih melanggang di tempat tidur padahal matahari su nae sampe ubun-ubun. Ina Feok masok kaluar kamar lima kali, ma Ama Tobo ngorok tarus.
Andia ko aer cuci piring satu baskom langsung mandarat di Ama Tobo pung kapala ko bapatua tahedek mata manyala ko malompat dari tampat tidur.
“Bajir-banjir, gempa bumi,” Ama Tobo kira ada banjir ko gempa langsung lari kaluar kamar sambel hiki dia pung sarung dadolek. “Su rasa, kana aer baru tahedek ko bangun hang. Kalau sonde, lu ukur bantal tarus sampe tengah malam buta,” Ina Feok.
“Mama sayang juwita hati puspita bunga ditaman e, jang talalu mangamok ka, be talalu cape iko itu fan treking ko apa dia pung nama jalan sante di namosain kemarin tu,” Ama Tobo mulai kas alasan.
Sambe iko dia pung laki duduk di balai-balai luar rumah, Ina Tobo mulai tarek gas lae. “KO apa dia pung manfaat e, lu ada dapat nilai lebe apa dari itu acara ju,” Ina Feok boto-boto lae.
“Mama e, talalu banyak dapat manfaat hang. ilmu baru, informasi baru, badan sehat lae, dapat kawan banyak lae, katumu pajabat, katumu binaragawan Ade Ray tu, mama. Be mau kayak dia e, badan jadi tarus terkenal lae,” Ama Tobo mulai manghayal.
“Ho mama, mama talalu rugi sonde iko kemarin. Be deng teman-teman dong dapat hadiah banyak hang. Ini foto-foto be deng Ade Ray,” Fin, Ina Feok pung anak parampuan ju bela dia pung bapak.
“Basong mulai putar balek su, sapa yang buat itu acara o hadiah bagitu banyak,” Ina Feok mulai selidik.
“Mama, itu pengusaha besar. Dari Imperial Groups deng Pos Kupang tarus ada sponsor laen yang ikot. Ini be dapat jam dinding deng kaos ni mama,” Fin mulai pangaruh.
“Mari duduk ko beta carita deng mama to. Mama e, itu lokasi di Namosain itu Imperial Groups su beli untuk bangun hotel deng rumah mewah. Lima tahun lagi, ini Kota Kupang su mantap mama, sonde akan katinggalan deng kota besar lain. Baru mama tau ko sonde, yang punya tu ternyata anak asal dari NTT,” Ama Tobo mulai angka carita.
“Batul mama, lia tahun depan, katong ju bisa pi bermain permainan yang ada di Jakarta deng Bali tu. Banana Boat na, terbang deng parasut na, tarus ada itu tempat untuk orang nikah tu mama, pokoknya Kupang akan maju mama,” Fin ju batambah.
“Batul itu samua ko? Ado e, kanapa ko beta sinde iko kemarin e, bisa bafoto deng Ade Ray. Bararti itu orang datang pi Kupang buat maju masyarakat deng ini daerah. Semoga ko Tuhan berkati dia e,” Ina Feok pung emosi su turun.