LAI sadiki hari lai, su mau hari raya Lebaran. Ma masih talalu banya perusahaan yang bolom kasi Te Ha eR buat dia pung karyawan dong. Dinas Nakertrans Kota Kupang su ada buat rancana ko mo sidak perusahaan dong. Kalo dong sonde kasi Te Ha eR na, dinas mo kasi sangsi.

"Awi, ko minggu depan su hari raya, baru dinas mo pi sidak. Su talalu talat tu. Kanapa ko musti tunggu sampe minggu depan. Sakrang ni, orang butu doi, mana skarang lai, harga barang-barang termasuk sambako dong su nae ceke leher na. Ada ju kawan-kawan dong yang mo pulang pi kampong karna ada cuti bersama babarapa hari. Na tau sa, kalo pulang kampong sakarang ni, tiket pung harga, ceke kotong pung batang leher," Ama Tobo angka baomong deng dia pung kawan.

Ama Tobo carita, kalo dia pung kawan karja dong, su mangalu karna harga dong tamba nae tarus. Tartau mo beli apa tenga apa. "Mana ada baras yang harga lima ribu lai. Su tar ada. Bolom lai musti beli minya goreng, mantega, tarigu, telur. Samua barang su nae harga. Untung ko kotong ni laki-laki, tar usa pikir uang beli bagitu dong. Biar ko mama mama dong sa yang pikir taputar karmana ko doi bisa cukup," Ama Tobo baomong sambil katawa.

Ama Tobo pung kawan akirnya manyao deng Ama Tobo. "Itu su, kadang-kadang beta ni heran. Pamarenta ni baru mo karja kalo di koran su tulis, baru dong bekin rancana. Harusnya itu rancana tu su ada karna ini dari taon pi taon salalu sama. Masi ada banya perusahaan yang bolom bayar. Memang kotong ni, salalu talat na bertindak."

Karna dengar kata bartindak, Ama Tobo ada inga kalo dia pung  bini, Ina Feok ada suru dia ko pi gade galang mas di pegadean karna dia pung ana su noki-noki minta doi buat bayar uang les di sakola karna dong su maso kalas ujian na. Ama Tobo capat-capat pamit deng dia pung kawan, taku kana masparak dari bini karna farlope dia su dudu talalu lama bacarita. (hermina pello)