AMA Tobo paling sanang kalo su deka-deka deng hari raya Lebaran ko hari Natal ko. Karna kalo su deka hari raya, dong pasti dapa tarima Te Ha eR.

Ma ini kali, waktu su makin deka, ma Ama Tobo lia tar ada tanda-tanda kalo dong dapa Te Ha eR. Ama Tobo su pikiran, karna itu doi biasa dia pake beli barang-barang yang besar. Taon lalo Ama Tobo beli kulkas yang dua pintu, andia ko dia pung bini sanang mo mati.

Ama Tobo dudu tongka dagu di dia pung ruma. Bapatua tar ada samangat. Ina Feok sampe tanya kanapa ko dia pung laki bagitu sadi tu. Mamtua sonde tau tentang Te Ha Er. Yang dia tau, sa, tiap bulan dia pung laki bawa pulang gaji.

Ma waktu Ama Tobo baca koran, dia agak sadiki terhibur karna ada banya yang bolom tarima Te Ha eR, jadi dia pikir dong pung perusahaan ju masi tunggu satu ko dua hari lai baru kasi dong pung Te Ha eR.

"Memang sadi batul, kotong orang kici ni. Mo tuntut Te Ha eR, taku, jang sampe kana semprot dari perusahaan, ma kalo sonde tanya ju, kapan lai kotong bisa beli barang," Ama Tobo baomong sandiri.

Ina Feok sonde mangarti Te Ha eR, jadi mamtua tanya Te Ha eR tu apa karna yang dia tau salama ini, Te Ha eR itu taman hiburan rakyat. Jaman dulu, kalo mo 17 Agustus na, ada TeHaeR, sama ke pameran bagitu. Dong biasa pi nonton.

Ama Tobo yang ada sadi, langsung pica katawa dengar dia pung bini pung pertanyaan.

"Makanya jang hanya pasmen di muka ruma sa tiap hari, coba dengar barita di tivi ko, radio ko baca di koran ko. Kalo tiap hari  hanya pi bacarita orang pung kurang na, karmana bisa tau. Te Ha eR tu tunjangan hari raya. Kotong harap ko dinas nakertrans bisa pantau, biar ko kotong ju bisa dapa Te Ha eR," Ama Tobo kas jalas dia pung bini sambil sanyum-sanyum. (hermina pello)