KAMARIN orang di Manutapen dong tahedek karna tiba-tiba ada anjing yang piko ame bayi yang su meninggal. Bukan hanya di Manutapen, ma amper samua orang di Kupang kaget deng sadi. Orang dong baomong tarus itu kejadian. Ina Feok dapa dengar orang dong bacarita di pasar. Ina Feok kaget karna dia tar dapa dengar itu carita. Andia ko waktu orang dong baomong, mamatua hanya pasang talinga babae sa.

Ina Feok dapa dengar itu carita, Ina Feok pung kakodok lai. Mamatua pulang dari pasar, langsung kas turun barang balanja, ko dudu angka kaki.

"Kurang ajar, itu sapa yang bekin bagitu tu. Mana ko ana su lahir babae, na dong bekin bagitu. Beta harap ko polisi dong cari tau itu orang. Kalo dapat, na kotong pi kadeluk dia dian pung leher, biar ko dia ju rasa. Mana ko tar ada pung hati. Orang laen ada susa satenga mati, e, ini orang, su dapa anak, dong buang bagitu sa," Ina Feok boto-boto di rebis dia pung laki, Ama Tobo
Mamtua tu, biasa kamatek-kamatek ma, waktu dengar itu carita, mamatua langsung makrarapak ko minta pi lia di Manutapen.

"Ama, kotong pi lia itu tampa do," Ina Feok buju-buju deng dia pung laki. Ina Feok pung maksud, nanti kalo dong pung tatangga datang bacarita, na dia ju bisa omong lebe banya karna dia su pi lia ame itu tampa.

Ama Tobo langsung katawa memang. "Lu ni, sama ke polisi sa, mo pi lia di TeKaPe. Memang kalo lu pi, na lu mo dapa apa di sana. Kotong tunggu sa, kotong harap polisi dong harus bisa temukan orang yang buang itu bayi tu. Lebe bae, lu pi bekin kas beta kopi do, beta pung kapala su mulai sakit ni."

Karna Ama Tobo tar mau antar, Ina Feok sonde mo bangun pi bekin kopi. It parampuan tu, dudu tarus, sambil baomong tentang itu ana bayi. "Awi, kalo dong tar mau itu ana, na dong jang bekin bagitu tu. Lebe bae dong kasi di keluarga. Kasian, e. Itu ana tar sala, ma, dia yang kana. Dong tar kira ko, kalo itu su membunu. Pasti orang yang buang ini ana ni, orang yang malu,"
Ama Tobo kas inga dia pung bini kalo ada apa-apa tu na jang ame langka sandiri, lebe bae pi lapor polisi. Karna kalo ada apa- apa nanti ju dong yang tanggung. "Jang suka maen hakim sandiri. Kalo lu kadeluk ame dia pung leher, tarus ju dia mati, e, lu yang masi panjara tau."

Ina Feok manyao deng dia pung laki karna dia parotes. Ina Feok bilang dia ju mangarti hukum, ma itu karna ungkapan karna jengkel. Ina Feok bilang, dia ada rancana ko mo pi kasi sosialisasi di orang-orang dong, biar ko masarakat ju iko liat, kalo ada orang yang tingka laku ane-ane biar ko ini kejadian sonde tarulang lai. (hermina pello)