PAGI-pagi buta, Ama Tobo su angka kaki pi pinggir pantai Sulamu. Baptua piko kulit batang pisang di belakang dapur yang su bakuning. Ama Tobo son bawa jala deng kael ju.

Ina Feok ada turun tampa tidor son dapa lia baitua pung sandal jepit lae. Son puas pi maloi belakang dapur, jang sampe su kas kaluar anak ayam dar kandang. Banyangan sa son ada, apa lae badan. Itu ti'ilangga ada tegantung di rebis rumah ju su son ada. Mangkali itu rambut putih su angka bawa pi laut sana.
Ina Feok su son mangarti lae deng baitua. Mangkali ada semangat empa lima mau terima doi bekin rumput laut.

"Bae su tete manis su dengar ketong pung doa, ada hamba Tuhan kas doi mo bantu bekin rumput laut. Itu hari, su tanam sampe kulit dong hitam kena matahari. Sampe dia pung hari mo panen, itu rumput su tagulung sama ke mie goreng. Minyak ada teapung di laut. jadi itu rumput son bisa bernapas lae," Ina Feok baomong sandiri.

Mamtua ada kasian dia pung laki. Taku Ama Tobo pung kampung tenga kukuruyu maso angin, lebe bae ko iku pi laut bawa kopi kental. Apa lae, tadi malam su rebus pisang memang tenggal kas baitua maale telan deng kopi.

Dar jauh mamtua su tahedek mati pung lia dia pung laki, pake celana setengah tiang deng topi ti'i langga di kepala. Baju kaos dong su kotor kena pasir.

"Jang sampe baitua ada maloli di pasir sana, sampe itu baju dong su berubah warna," Ina Feok su jalan  deka deng dia pung sayang.

"Na, Ina. Lu su sampe ? Be kira lu son melo'i beta lae. Dar tadi be su lemas ne, aer kopi belum maso dalam perut na. Be siap memang ini tampa, biar kalo itu bibit deng do'i su terima jang pake tunggu lae. Skarang itu minyak su mulai kurang, jadi itu rumput laut pasti jadi," Ama Tobo su kas peneguhan dia pung bini.

Mamtua Feok su bebantu baitua tarek tali ikat di pohon, biar ko sonde tagulung lae. Su lama na, ini tali son pakai lae.
"Lebe bae terlambat asal bisa tanam lae rumput lae, kalo panen satu kali ketong son perlu cape-cape bairis batang pisang kas piara babi dong," Ina Feok kas samangat.

"Ina, biar ketong karja tanam ini rumput laut. Itu piara babi deng ayam jang kasi tenggal. Ini berkat, jadi harus kerja serius deng semangat empa lima," Ama Tobo su istirahat ma'ale pisang rebus. Ina Feok dudu disamping hanya melerok sa, bekin mata putih tebalek. (rosalina woso)