Ama Tobo ju son mau kalah. Lak-laki mulai ba-otak-atik dia pung motor. Son tau apa yang dia bekin. Lak-laki batasibu cari konci di gudang. Baptua mulai pariksa itu motor pung onderdil sampe laloli di bawa kolong.

Begitu bangun, Ama Tobo coba kas idop deng begas-begas sampe Ama Jola lari datang. "Bu... akurang ko pag-pagi bagini su bagas motor, ada yang song beres ko," Ama Jola batanya sang dia pung sobat.

Ama Tobo yang lagi enak begas motor hanya sanyum sambil jawab dia pung sobat. "Sond ju bu... hari ini ketong barancana pi piknik di luar kota, jadi motor harus ok to jang sampe jalan-jalan ju motor rusak.. itu tamba soe lai."

Ina Feok selesai bamasak langsung menuju kamar mandi ko mandi ulang karna dia pung laki su siap dar tadi. Mamtua kaluar dar kamar mandi langsung siap makan ko mo jalan.

"Papa... ajak bu Jola ko ketong makan dolo... su tengah hari ini ketong buru-buru mo jalan su taku kawan dong batunggu talalu lama na."

Ama Tobo langsung ajak Ama Jola masuk rumah ko makan sam-sama.  "Bu... mari ketong makan sadiki dolo... maitua su pange dar dalam," Ama Tobo langsong hela Ama Jola pung tangan ko jalan masok pi ruang makan.

"Mari dudu bu... ketong makan dolo, ais sadiki lai ju ketong ada pi piknik di luar kota," Ina Feok ajak sang Ama Jola.

Sementara makan Ina Feok batanya sang dia pung laki. "Papa... motor su siap ko? Jang sampe ketong jalan-jalan ju rusak lai na parah su?"

"Aman sa mama motor  su oke, beta ju fit siap tempur sa," Ama Tobo kas kuat dia pung bini.

Ama Jola yang dar tadi dudu dia ko makan, kas inga dia pung sobat Ama Tobo... bu.. su mo jalan ma jang lupa pake helm. Ketong pake helm supaya bisa lindungi ketong pung kapala kalo jatuh.

Ama Tobo belum jawab, Ina Feok su tasoso ko baomong. "Andia ni... ketong pung anak - anak sakarang setiap hari minggu son parna pake helm. Su bagitu ada yang babalap lai kalo jato kir - kira dong pung kapala pica ko sonde," Ina Feok su naek darah.

Ama Tobo son mo kalah langsong manyao. Itu su... dong balari sonde pake helm di dapan polisi pung muka ju aman sa, apalai nona-nona dong hanya tendes mata sa  polisi jatoh hati deng kas lewat biar salah  deng langgar atoran lalu lintas.

"Andia ni... ketong harap bapa kapolda baru ni bisa tertibkan orang yang sonde pake helm deng babalap di jalan umum. Kalo sond ketong masyarakat biasa sond rasa aman na kalo jalan-jalan," Ama Jola kastau dong dua laki bini. (thomas duran)