"Awi, itu anggota dewan pung bae lai. Bisa kasi uang bagitu besar tu, itu doi mau babagi pi sapa o. Kalo beta tau, na beta daftar paling doluan ni."

Ama Tobo tiba-tiba dapa inga kalo dia ju ada simpan doi ampat ratus ribu di bawa koi tampa tidor. Itu doi su lama simpan, dia taku kalo dia pung bini dapa lia itu doi andia ko capat-capat dia pi ame tu.

Baptua sonde tau kalo dia pung bini tu ada iko dia pung balakang karna Ina Feok su mau pica katawa dengar dia pung laki pung baomong.

Mamtua kasian deng dia pung laki, jadi mamtua kasi jalas deng dia pung laki. "Andia su kalo mangarti satenga-satenga bagini sa. Baca na jang satenga-satenga ato hanya dia pung judul sa. Dulu orangtua suru pi sakola na, lu pi tapaleuk na, ini su dia pung hasil. Untung ko kotong pung ana pung tingka laku son sama ke lu yang pi papalele tiap hari di sakola," Ina Feok kasi mangarti deng dia pung laki kalo itu anggota De Pe eR RI tu kasi kirim doi pi satu bank di Sabu. Itu doi tu kira-kira untuk doi suap ko lepas ame 43 imigran gelap.

Ama Tobo langsung pica katawa. "O bagitu ko Ina. Beta kira dia kasi doi ko bagi-bagi. Untung ko beta bolom pi bacarita di tatangga dong o, te kalo sonde, pasti dong su olok mati deng beta ni."

Ina Feok tu kalo baca koran yang dia pung isi tentang suap, pasti mamtua baca sampe dua tiga kali. Ko mamtua paling sanang baca barita yang bagitu na. Apalai kalo dalam itu barita ada tulis orang pung nama yang tarima suap.

"Itu dolo, jang hanya baomong sa, bilang ada suap di sana, suap di sini. Kalo barani baomong na musti ada bukti dolo. Jang sampe su koar koar kaliling kampung te tiba-tiba tar ada bukti. Orang kasi maso di bui fare-fare su. Kotong ni musti tiru bagitu, ada bukti baru baomong," Ama Tobo yang su tasala tadi, supaya tar malu, baptua langsung tamba dia pung pendapat.

Baptua bilang kalo yang paling panting tu bukan hanya dia pung bukti sa yang su kasi ma orang yang tarima ju musti sarius urus itu masala. Biar ko yang su tarima tu kapok su tar ulang lai. "Ma kalo bagitu tu bisa terbukti ko sonde e. Kalo sonde terbukti na sama sa. Kotong tunggu sa dia pung langka apa yang mau dong ame." (hermina pello)