"Ju ada manusia tingka ke apalai," Ama Jola batanya deng Ama Tobo.

"Be rasa ente su tau ju. Jang sangaja batanya lai. Jang sampe ente pung tingka sama ke Serigala babulu domba ju."

"Kawan jang fitna bagitu. Katong dua su dar kici-kici su bakanal. Sampe ada ana bini ju katong dua sond bapisah jao. Ko kanapa ente bisa bilang bet bagitu lai," Ama Jola tanya  ame Ama Tobo.

"Kawan bet bilang bagitu, cuma mo pancing ente pung emosi sa. Soalnya ente bar bisa baomong banya kalo lagi emosi," Ama Tobo kastau Ama Jola.

"Jadi bagini kawan. Bet lanjut kastau sang lu. Ada manusia pung tingka ke  Draculas. Ente tau to itu Draculas. Ini manusia ke di film-film, hanya mo isap orang pung darah sa. Dia  ju culas deng egois mo mati," Ama Tobo, kas panjalasan pi Ama Jola.

"Dong memang manusia rakus, balalas deng  egois. Itu  manusia, di dong pung kapala otak ponu kuasa galap. Dong hanya bapikir mo kas susa banya orang," Ama Jola sambong.

Dangar Ama Jabok baomong, Ina Feok sambung dar dalam kamar. "Kalo dapa lia orang susa dong sanang mo mati. Su bagitu, dong paling munafik mo mati. Liat orang susa sangaja kasihan deng  itu orang. Ju kalo di orang banya dong sangaja kas doi."             

"Awii, mama ju emos o..... Mama kalo baomong satkali lumayan ju. Ma pung kata-kata ju talalu baisi mo mati. Bet sond sangka bet pung maitua bisa omong pintar mo mati. Woe.. tua, lu jang kira katong hanya di dapur sa, sond tau perkembangan," Ama Tobo potong ame Ina Feok baomong.

Belum puas  bacarita, Ina Feok tanya ame Ama Tobo. "Tadi lu omong beta bilang beta pung kata-kata baisi. Tolong lu kas jalas itu kata do,"

Ama Tobo dangar dia pung maitua batanya, muka sanyum kol bungkus.

"Bagini, mama jang  kas kaluar itu kata-kata sarempet-sarempet bahaya. Bet sond punya maksod deng itu kata. Tapi kalo ma pung maksod laen, terserah mama sa. Ko dosa mama yang tanggong sandiri to," Ama Tobo kas jalas dia pung maitua.  

"Adu papaeee, jang mara e. Beta talalu emosi na. Tapi kalo papa pung maksod sarempet bahaya sond apa ju. Bet ju mangarti na. Katong dua khan su lama jadi  laki bini to? Mama su tau papa pung mau. Papa ju tau mama pung mau," Ina Feok sangaja manja di dia pung laki.

"Papaeee, darpada katong dua baomong, kapala pusing. Lebe bae katong pi kas barisi kabun.  Parsetan deng itu manusia draculas. Lebe bae katong urus kabun, darpada baomong itu manusia sonde tau diri," Ina Feok ajak dia pung laki pi kabun. (reddy ngera)