Takuju Ina Feok su batarea ko kas kaget samua isi ruma. Tatangga dong ju su takuju, ais ko maitua pung batarea ko ada yang su mo mati mampos na. Maitua ju su manangis cina sa di ito rebis ruma. Maitua manyasal mo mati.

"Aue..karmana beta mo kas sakola ana ni. Bolom apa-apa ini barang deo su bagini model. Be mo pake apa lai ni. Ana dong su mo ujian akhir ni," Ama Tobo yang ada kas dingin makanan babi ju su malompat sa pi lia dia pung bini.

"Ko mama su kanapa ni. Son ada ujan angin te su batarea sa. Ada yang su mo mati mampos ko?" Ama Tobo komentar son lia dia pung kandang babi. Ina Feok su tare ame baptua ko pi kandang.

"Mo son manangis karmana bapa, lu lia su. Lu satanga mati iris pisang salama ini. Te lu mo kas makan apa lai. Lu lia itu babi su teler tu. Lu pi fi'i su. Itu mo bajual ju orang son beli. Lu mo bekin apa su deng ito binatang." Ama Tobo su dudu talepo sa di bawa kandang. Ais mo karmana lai. Orang bilang nasi su jadi bubur. Lu kas bangun su, itu babi su kaku sa.

"Mama, katong pung sala apa ni, andia katong pung piaraan dong mati takuju bagini. Tadi malam beta pi kamar mandi te be dengar dia mas ada banapas bae-bae. Jang-jang ada yang kas racun. Katong pi pariksa do. Te sonde lama Ba'i Ndu ju su batarea dia pung ju. Ais baptua pung babi mai dua ekor yang tenga mo melahirkan ju su talepo son sadar. Baptua mo garu-garu ju ini babi su diam sa.

"Puka ra'a karmana ni. Beta pung ju sama ke disitu. Ini mangkali virus ko panyaki apa ni. Ini barang dong su takuju bagini." Dong tiga diam sa, son bisa baomong macam-macam. Ais ini babi dong takuju-takuju sa. Satiap hari dong kas makan dedak deng batang pisang yang su dimasak.

"Sakarang ni panyaki muncul ane-ane sa. Ini papaya dong ju takuju ju su mati samua kana kutu. Jagong, padi ju balalang makan kas ais. Sakarang muncul pi babi dong mati takuju sa. Sabantar lai ayam, ko sapi ko anjing. Katong ni karmana su ni. Lam-lama katong bisa mati kalaparan. Ini ana dong mo pi sakola doi dar mana." Ama Tobo su ke orang yang bekin litani ko.

"Teman e..beta rasa jang sampe ini hukuman dar Tete Manis o...Katong manusia sakarang ni dapa musiba ane-ane na. Lu tau to karmana ito kitab suci bilang tanda-tanda jaman." Ba'i Ndu kas kotba dia pung kawan. Ama Tobo deng Ina Feok yang  ada dengar sarius te su mangkarut sa. Dong dua panas ju. Ais ada baomong babi, te dong pung kawan Ba'i Ndu su komentar ito  kitab suci dong.

"Lu ni beta ada emosi deng be pung babi mati takuju te lu pi omong ito kitab suci dong. Lebe bae sakarang katong pi baomong deng itu ama-ama di kantor sana. Jang sampe ada obat ko apa ko. Supaya ini babi dong jang mampos samua. Yang mas idop ni bisa minta suntik ko biar dong bisa sambung katong pung idop. Ini kalo mati samua, katong mo dapa doi dar mana lai?" Dong tiga su diam sa. Ais son tau mo baomong apa lai. (apolonia matilde dhiu)