"Ama, pi cari lemun su, beta su kapingin makan lemun cina ni. Lu mau pi cari di mana sa, yang penting pulang na bawa lemun e. Kalo sonde bawa lemun, jang coba-coba ko maso dalam ruma e," Ina Feok eki ame dia pung laki.

Ama Tobo pusing su, ko mo pi cari lemun cina di mana o, bolom musim na. Biasa musim lemun pas bulan ampat ko bulan lima na. Ma baptua jalan sa, sapa tau di pasar ada yang jual lemun.

Tarlama ju baptua kambali, pi dalam ruma deng tangan kosong. "Adu Ina e, jang mara e. Be su kaliling kota ma, lemun sonde ada. Ina tau ko sonde, kotong pung lemun, yang orang dong bilang jeruk keprok SoE tu, su kana panyakit. Su banya tanaman yang mati ko kana panyakit. Ada tiga jenis panyakit. Yang beta dengar, itu panyakit CVPD tu yang paling ganas. Ma pamarenta bilang bolom ada," Ama Tobo kasi jalas deng dia pung laki.

Ina Feok su pasang muka ampa lima. Mamtua son nodek lai, apalai mo dengar dia pung laki pung baomong. Ma tarlama dia pung laki kas kaluar jeruk yang dia beli  dari mal. Biar bukan lemun cina ma yang penting dia su ada usaha.

"Jang pasang muka bagitu dolo. Ini beta su bawa jeruk ni. Ina tau ko sonde, su tiga taon ni, kotong pung jeruk keprok SoE su banya yang mati."

Ina Feok pung muka langsung barubah, ju mamtua manyao deng dia pung laki. "Itu su, kotong pung pamarenta ni talalu talat. Su banya yang mati baru dong bilang musti ada parhatian. Ko salama ini dong pung mata di mana. Itu penyulu dong ju ada di mana e. Jang hanya baomong sa, ma sonde ada aksi di lapangan. Itu sama ke tong kosong babunyi nyaring."

Ina Feok baomong tarus. Mamtua su kawatir jang sampe itu jeruk keprok SoE pung nasib sama ke apel SoE. Mati samua, baru orang dong mulai baribut.

"Ko bilang ini jeruk su maso varietas nasional, na pamarenta jang hanya diam sa. Capat su, mo bekin apa ko, jang tunggu sampe su abis," Ina Feok baomong sama ke tau-tau sa. (hermina pello)