Ama Tobo ada kas pinda sapi pi kebun pung takuju mati pung. Mata hari su naek pi kendok, mo itu awan son tau geser-geser kas jalan biar ko itu panas maso kena sadiki itu anak pung baju deng sapatu ada babasa. Kalo sonde, pi sakola deng sapatu bebasa, anak dong pung telapak  kaki bajamur badempet deng sepatu lembab.

Baptua su napas lega. Itu sapi su taikat bamakan rumput hijau mati pung. Matahari belum naek pi atas kapala, sapi su kas babat rata itu rumput. Dar pada tunggu itu sapi bakunyah, lebe bae ko baca koran dolo. Biar ada kas tambah ini otak deng barita, son lama su pikun kalo son baca tiap hari.

Baptua Tobo, su komentar sama ke orang mo kampanye. Ini bapa Dewan deng pamarenta su bakalai gara-gara itu paroyek Oelamasi. Utang dong su mo pikul pake karung, dia pung barat karat sama ke barat emas dua puluh lebih miliar. Mo son tau bayar-bayar pi orang yang karja, dong masi betarek urat leher, batola hela. Takut salah palu. Pamarenta pung mau laen, mesti kas maso itu utang pi anggaran, mo bapa Dewan dong pung mau laen. Son boleh kas maso anggaran. Nanti tender ulang, kalo orang yang karja paroyek kalah, mau bayar karmana. Itu kantor dong su karja abis.

Gara-gara itu paroyek Oelamasi, itu palu son tau pukul di atas meja. Mungkin dong bapa Dewan dong taku maso panjara, kalo salah ketok palu. Andia ni musti balajar banyak tentang ilmu doi dong, biar son salah-salah mangerti. Kalo su batasala bagini, sapa yang jadi korban lai.

"Sama sa, kalo beta son mau iku-iku dong lai. Be pung mau, kas maso dalam anggaran dolo. Biar itu doi di kas bisa kas doi kambali maso pi anggaran. Kalo sonde mau bayar karmana lai, nanti itu BePeKa kas tegur lai. Lebe bae bekin su kas maso, biar itu kantor cepat selesai. Pegawe dong bisa pi karja di Oelamasi," Ama Tobo baomong sendiri.Ama Tobo pung maitua Ina Feok ada bekitu kurus di rebis rumah son mo kalah deng paitua. "Biar ko kas simpan memang di anggaran itu utang dong. Lebe bae ko bayar sudah, biar son talalu berat pikul utang. Itu doi su ada di kas, hanya kalau mo  bayar mesti pake kas maso pi dalam anggaran. Biar kas tulis memang di buku Ape Be De, ini tahon pamarenta bayar utang kantor Oelamasi," Ina Feok omong sambil kumpul kurus di tangan kas basambar omong dia pung laki.

Ama Tobo ada baduduk bakunya okomama su tambah emosi, darah pung naek di atas kapala.  "Kalo beta yang karja itu kantor, be su dar dolo minta bayar utang. Mo pung enak lai, memang ko be bekin tembok pake angin. Ada doi dolu baru beli semen deng pasir, kas campur deng air baru plester itu tembok. Son ada lai di dunia sakarang yang gratis. Samua pake doi, beli beras kas makan tukang. Hanya napas sa yang son bayar. Teta manis masih basayang deng ketong mati pung," Ama Tobo nasehat dia pung bini. (rosalina langa woso)