Mae, dengar bapa omong ka sonde? Ama Jabok tanya ambe dia pung ana lak laki, Ama Mae. Beta pung talinga sond oek, bapa omong bet dengar, tapi beta sond sama ke kuda liar. Bapa jang omomg beta ke bagitu. Biar, bet anak. Bet sond tarima bae. Mae kastau ambe dia pung bapa.

Woe... Mae, sapa yang baomong lu sama ke kuda liar? Tadi, bapa sond kastau lu bagitu. Bapa bilang, kuda liar di padang rumput. Bukan bilang lu, sama ke kuda liar. "Ana kici, su mulai baputar kata deng orang tua. Lu pung otak sapa sond tau. Lu sangaja kas baputar kata, mo buat bet, babingung to?" Ama Jabok su mulai dar nae, kastau ambe Mae.

Mae su dangar, dia pung bapa bamarah dudu diam di bal-bale, tondo kapala. Mae pung tangan kanan, garu ambe kapala. Padhal kapala sond bagatal. Mae pung tingka kalo su bagitu, tandanya dia ada tahan emosi. Mae memang sond tatalu bacocok deng dia pung bapa. Kalo su kana mara dar dia pung bapa, Mae pung badan gamatar. Biar su baulang kali kana mara, Mae masti basambong mulu na.  

Balom puas deng mara deng kata-kata tadi, Ama Jabok sambong kata lai. "Lu memang, ana paling ancor. Orang tua mo kas nasehat, sond mo dangar. Lu pung biasa masti basambong mulu."

Dangar Ama Jabok pung kata-kata, Mae agak tondo kapala sadiki, masih manyao lai. Mae, manyao palan sa. Mae, su tau na....! Dia, pung bapa pung talinga sadiki oek. Makanya dia manyao palan ko baomong, "Bapa ju ancor na. Minom laru sond tau barenti. Kalo, su foe, minom laru dar pagi sampe malam. Biar mama tagor ju, sond mo iko."

Mae sond tau hal, Ama Jabok ada parhatikan dia pung mulu ada bagarak. Ama Jabok, tamba nae dara lai. "Lu pung mulu bakomat kamit apa lai?"

Dangar dia pung bapa tanya, Mae langsong manyao, "Beta baomong deng mama, bukan manyao deng bapa." Mae memang mas ontong, pas dia pung mulu komat kamit, Mae dapa lia, dia pung mama, datang dar rebis ruma. Dia pung alasan memang pas na. Kalo sonde sa, mungkin, Ama jabok, su angka lalepak, ko bonggo sang dia.  

Ina Eting, dangar Dia pung laki, baterea karas, langsong sambo mulu. "Su kanapa lai, Bapa mara sang Mae. Lu, masti kas ajar, lu pung ana manja, tu. Tadi bet mo kas nasehat, dia sond mo tarima na. Ama jabok sambong kata lai, tadi bet pung maksod, mo kastau sang dia. Kalo nae motor, di jalan jang talalu, balari kincang. Itu jalan, tu banya orang yang pake. Kalo balari har baibiruk, dia pung rasiko talalu basar. Jang su kana calaka, bar dudu manyasal.

Tolong ko sadar eee. Jang kaki tangan su pata ancor-ancor bar dudu manyasal. "Mae, bet sayang sang lu, makanya bet kas nasehat sang lu. Tolong ko sadar eeee." Ama Jabok ulang lai itu kata. (reddy ngera)