Tapaleuk: Gong Xi Fa Chai

Gong Si Fa Cai. Beta minta maaf lahir dan batin. Semoga kita terus menjadi sahabat sejati dalam suka dan duka.

AMA Tobo pung kawan Cina talalu banyak. Baitua ini hari bataputar kaliling satu-satu. Tau to. HP ada rusak, jadi sonde bisa SMS kasih salamat. Makanya baitua maso ruma kaluar rumah ko salamat.

Ontong sa sonde ujan. Jadi baitua maluncur enak. Ini basodara dong sanang mati terima Ama Tobo. Dong bakawan dari kici na. Orang bilang kawan rasa sodara.

"Beta minta maaf kalo salah. Di hari bae bagini, kitong musti saling batogor. Liat pi belakang, apa yang sudah kitong jalani. Salah benar, kitong perbaiki dan jalani sama-sama."

Ama Tobo omong ini kata-kata terus. Maso satu rumah, omong itu, ais itu kaluar di seblah, omong lai. Su hafal memang na. Apalai itu ucapan hari raya yang pake bahasa Cina. Sonde salah memang. Sonde tau dia pung tulisan, ma kalo pake omong sa, Ama Tobo jago na.

"Gong Si Fa Cai. Beta minta maaf lahir dan batin. Semoga kita terus menjadi sahabat sejati dalam suka dan duka."

Ini kata-kata dong beken orang su malele memang. Ama Tobo na. Pulang sampe rumah, rogo saku kiri kanan, ponu deng amplop merah. Sadiki-sadiki sa. Ma hitung su. Kalo puluhan amplop, hanya sekadar laru putih sa, Ama Tobo sonde lari.

"Sorong datang itu amplop dong. Orang doa itu doe dong baru kasih lu. Jangan coba beli laru. Lu kena toki dari beta." Ina Feok su badiri memang di rebis. **

Penulis: Sipri Seko
Editor: Sipri Seko
Ikuti kami di
KOMENTAR

BERITA TERKINI

© 2019 TRIBUNnews.com Network,a subsidiary of KG Media.
All Right Reserved