Tapaleuk

Salamat Taon Baru

Ama Tobo pung mata masih babangka. Aer balom satu titik ju kena di muka. Jalan masih tagoyang-tagoyang.

Salamat Taon Baru
GRAFIS POS KUPANG/TYA MEOK
ilustrasi 

POS-KUPANG.COM - Ama Tobo pung mata masih babangka. Aer balom satu titik ju kena di muka. Jalan masih tagoyang-tagoyang. Bibir tagantong panjang ke su satu minggu sonde isap tembako sek.

Sampe ayam su turun baru Ama Tobo tidor. Ma papagi mus bangun su. Tadi malam baitua sonde bisa tidor. Tau to. Acara tutup taon. Mabok sampe pagi.

Orang dong pung bakar kembang api ni, setan dari lobang tasambunyi ju pasti takut ko lari ilang. Balom lai orang nae motor bagas besar-besar.

"Ini taon baru. Tadi malam tu kitong buang taon lama. Kalo yang lalu kitong kerja matahari su nae, taon baru mus lebe sedu. Mus barubah. Kalo sonde te taon depan ju kitong bagini tarus."

Ama Tobo omong deng Ina Feok yang su eok abis kopi. Mamtua sonde toe deng Ama Tobo. Lia piring yang su dari kemarin siang balom cuci, maitua kas beres memang. Sadikit lai su mau pi lia kobong na.

"Tak usah omong banyak. Lu pi cari daon ko kas makan kambing deng cari makanan babi. Taon lalu ju lu omong bagini. Panas sadiki, ais itu mulai foe ulang. Jang beken-beken ju ang. Biasa sa. Ko kanapa mus pake mau berubah. Kerja tu sonde pake taon baru ato taon lama. Mau kerja ya kerja."

Ama Tobo diam sa. Baitua memang taon lalu ju omong bagitu. Janji mo sonde minum lari, baitua foe ulang. Ma ini taon, Ama Tobo su janji mo berubah total na. Salamat Taon Baru! (Sipri Seko)

* Tapaleuk adalah rubrik khas Pos Kupang edisi cetak yang hadir sejak awal terbit tahun 1992. Isinya secuil esai ringan mengenai aneka fenomena sosial yang dikemas dalam bahasa Kupang

* Rubrik tapaleuk Pos Kupang hadir setiap hari Senin sampai Sabtu ditulis para wartawan Pos Kupang

Penulis: Sipri Seko
Editor: Putra
Ikuti kami di
KOMENTAR

BERITA TERKINI

© 2019 TRIBUNnews.com Network,a subsidiary of KG Media.
All Right Reserved