Buang Handuk Su

POS-KUPANG.COM--Ama Tobo pung badan son enak, ko dia bangun su siang tarang. Soalanya dia kemarin ada ikut acara di partai dong sosialisasi. Tobo ju masok pengurus salah satu parte na.

‎"Ama lu kenapa bangun lat bagini. Beta mo jalan pi pasar ju tunda gara-gara lu blom bangun," Ina Feok mengomel dia laki.

Ama Tobo yang dengar, diam-diam sa, ma dia son mo turun dar tampa‎ tidor.

‎Dia masih bolak-balik badan te dia dengar Bai Ndu pung suara su selamat pagi di muka ruma.

Tobo langsung bangun ko kaluar kamar. Dia liat Ina Feok, dia munafik ko ulik-ulik dia pung mata.

‎"Dari mana ni, ko papagi lu su muncul lai. Beta badan son enak andia ko baru bangun," Tobo duduk pangku kaki ko baru tanya Bai Ndu.

• Abubekar Ajak Masyarakat Nangaroro Sukseskan Pemilu 2019

• Yulia Atlet Kempo Mabar Segera Masuk Asrama di Kupang Menjelang Pra PON

• Ketika Warga Podenura Nagekeo Tanam Kelor. Pernah Makan Tapi Tidak Banyak Disini

• Miliki Teman yang Badannya Kurus Tapi Makannya Banyak. Anda Heran? Disini Jawabannya

"Beta ini hari datang ko cek koran ko mo baca, te kamarin beta pi ame pensiun, orang dong ada rame carita soal putusan pemilu di Soe sana," Bai Ndu kasi keluar dia pung roko saliti ko taro di meja.

Ama Tobo tadi malam tidor lat karna dong ada rapat omong soal pemilu di Soe jadi dia tao banya.

"Cerita panjang ama e, jadi tadi malam katong kebetulan rapat parte . Waktu rapat ada katong pung pengacara yang ajukan gugatan," Tobo omong di Bai Ndu.

Tobo mulai carita panjanglebar soal kasus pemilu bupati di Soe sana.

Ina Feok yang di belakang dengar sama ke ada dosen kas kuliah, jadi dia lari pi depan.

"Woe bosong dua foe apa ini, bacarita sama ke ada‎ mahasiswa kuliah," Ina Feok togor dong dua.

"Ina katongada omong soal pemilu di Soe sana,yang su ada hasil. Ini beta datang cek di Tobo karmana sudah, soalnya Tobo ju pengurus parte yang bilang kalah na," Bai Ndu jawab Ina Feok.

"Ama e, beta itu hari su omong, bilang katong tausah perkara lai, ma andia aturan bilang bisa gugat, andia katong gugat sampe di EmKa sana. Sakarang su ada hasil, jadi katong tarima," Tobo omong pelan-pelan.

"Itu su ama, kalo menurut beta yang awam politik ini, ada baeknya ama dong buang handuk su. Biar ko pembangunan di sana bisa jalan su," Bai Ndu nasehat Tobo.

Ama Tobo yang dengar son mangarti itu istilah buang handuk ko dia tanya ulang di Bai Ndu.

"Ama buang handuk itu, sama ke katong tarima su atau akui itu hasil pemilu," Ina Feok yang sambar dia pung laki. (oby lewanmeru).