Tapaleuk

Biar ko Kutu Mati

Dia mangomel tarus karna sakarang dia harus pi sapu pagi deng sore soalnya daon-daon banyak yang jatoh.

Biar ko Kutu Mati
GRAFIS POS KUPANG/TYA MEOK
ilustrasi 

POS-KUPANG.COM - Ina Feok deng dia pung laki mas pagi-pagi buta su batasibu. Ina Feok balom turun dar tampa tidor ma mamtua su boto-boto karna kamarin dia cape basapu di Jalan El Tari sana.

Dia mangomel tarus karna sakarang dia harus pi sapu pagi deng sore soalnya daon-daon banyak yang jatoh.

"Memang sakarang musim panas ko daon pohon dong jatoh, ma andia bukan daon sa te orang buang kotoran juga na. Kalo tiap hari bagitu na sapa son makan hati o," dia mulai kas turun kaki dar tampa tidor.

Baca: SEGERA CEK NAMA ANDA - BKN Pakai Sistem Ranking, ini Hasil SKD CPNS 2018 yang Diumumkan

Baca: Ini Sifat Asli Meghan Markle Pasca Jadi Istri Pangeran Harry yang Bikin Tiga Asisten Pribadi Mundur

Baca: Malam ini Zodiak Taurus Alami Keberuntungan Finansial, Sagittarius Ditimpa Masalah Moral

Ama Tobo su tao kalo dia pung bini ada mangomel bagitu lebe bae jang sambung te kalo sonde dia tamba foe.

"Ama kalo tiap hari bagini na beta mo kastao ko beta barena sa dar pada beta tiap hari tensi," dia su bangun di dapur sana.

Ama Tobo ju pikir dalam hati bilang ternyata benar ju te dia pung maitu memang cape.

Ina Feok su tao kalo dia pung laki sonde sambung itu karna balom minum kopi na. Andia ko dia su muncul dar dapur deng kopi.

"Woe ini pagi bosong dua sama ke orang baru pacaran sa. Beta dar tadi liat bosong dua ada serius baomong apa," Bai Ndu muncul dar balakang rumah.

"Ini ama, beta ini su satu minggu basapu di Jalan El Tari sana, ma andia masa ko pagi beta sapu kas barisi, nanti siang sadiki su kotor lai. Bagitu na coba daon sa bae, ma ini
kotoran dar dalam rumah abis deng gelas-gelas plastik dong," Ina Feok mulai curhat.

"Na te basong dua su dengar ko balom. Beta ada dapa info sadiki bilang sakarang ini katong harus tertib kalo buang kotoran te bapa gubernur ada rencana buat peraturan ko sapa yang buang sambarang kotoran dapa denda,"

Bai Ndu omong api-api.

Ama Tobo deng Ina Feok dengar bagitu dong dua hanya tanganga karna baru dengar kalo pemerentah mo denda orang yang buang sambarang kotoran.
"O kalo ada bagitu beta pot katong pung pemerenta. Memang dar dulu kalo buat bagitu mangkali orang son buang kotoran sambarang tampat," Ama Tobo bangun ko buang puntung rokok di tampa sampah.

"Kalo ada bagitu ju beta sanang karna kerja su kurang cape. Biar ko dong yang buang kotoran sembarang pung kutu mati memang, su bikin kamomos ma son tobat ko dong tiap hari buang tarus kotoran di jalan," Ina Feok langsung siap ko pi basapu di jalan te matahari su terbit. (Oby Lewanmeru)

* Tapaleuk adalah rubrik khas Pos Kupang edisi cetak yang hadir sejak awal terbit tahun 1992. Isinya secuil esai ringan mengenai aneka fenomena sosial yang dikemas dalam bahasa Kupang

* Rubrik tapaleuk Pos Kupang hadir setiap hari Senin sampai Sabtu ditulis para wartawan Pos Kupang

Penulis: Oby Lewanmeru
Editor: Putra
Ikuti kami di
KOMENTAR

BERITA TERKINI

© 2018 TRIBUNnews.com Network,a subsidiary of KG Media.
All Right Reserved