PLN Kapala Batu

Su anam bulan ni, listrik maen idop mati sonde jalas. Malu sadikit dolo. Sonde mampu na onslak jau pi mana ko.

"BETA su bosan bamaki. Beta su tobat. Sonde mau omong kasar lai. Su kapala lima ni, omong yang bae-bae sa. Sonde usah marah-marah. Ma ini PLN batul-batul kapala batu o. Sonde siang, sonde malam, maen mati trus. Tau dong pung mau apa."

Ama Tobo dudu ko maloe sang Ina Feok ada ika es manis di balakang. Mamtua ada bajual es manis di sakolah. Ma andia, ais ikat sonde bisa taro di kulkas. Listrik sonde idop na mo kermana.

"Ganti buang itu kapala. Kerja sonde batul ma kas diam sang dia. Su anam bulan ni, listrik maen idop mati sonde jalas. Malu sadikit dolo. Sonde mampu na onslak jau pi mana ko. Ini pamarenta dong ju dudu tanganga sa liat rakyat idop sangsara karena listrik maen mati idop."

Dengar Ina Feok sebut pamarenta, Ama Tobo balompat bangun. "Sonde bisa Ina. Kitong su omong ulang-ulang ma tetap sonde bisa. Ko itu pejabat dong sonde perna tau listrik mati na. Generator di rumah, bagitu PLN mati, ke tutup mata buka mata, dong pung listrik su manyala. Karmana ko dong mau tau kitong ada sangsara."

Mamtua deng bapatua baomong listrik sampe bakaringat. Ama Tobo su sonde pake baju lai. Karingat malele ke biji jagong. Ina Feok ju sama sa. Pake baju dalam sa. Mamtua ju sonde tahan lai na. Biasa bagitu dong dua dudu di pohon tambaring baru bacarita. Ma ini listrik beken dong dua sonde ingat itu pohon lai. **

Penulis: PosKupang
Editor: Sipri Seko
Ikuti kami di
KOMENTAR

BERITA TERKINI

© 2018 TRIBUNnews.com Network,a subsidiary of KG Media.
All Right Reserved