Su Mau Garatis

AMA Tobo pung bini ada kasi tunju doi nekel yang kici-kici dong. Tartau mamatua su kumpul doi kici dari kapan tempo ko, su ada satu tampa besar. Sambil ma'ale siri pinang, mamatua itong doi.

"Bae ju, amper saratus ribu. Su bisa bayar baras raskin ni. Ma dong mau tarima doi kici bagini ko sonde e. Lebe bae beta pi tukar sa di kios dong, biar dapa doi kartas."

Ama Tobo langsung manyao deng dia pung bini. "Tak usah repot lai Ina. Kotong tausa pusing lai karna nanti baras raskin tu su bisa garatis. Kotong pung walikota yang baru tu, su janji kalo nanti kotong tausa bayar raskin lai, samua garatis. Ma bolom sakarang, karna musti bahas lai di dewan dong. Bapatua bilang bagini, jang minta uang lai dari orang yang su miskin, jadi nanti pamarenta yang bayar. Bae ju, kotong sanang sa, kalo bisa dapa garatis."

Bapatua pung bini langsung pasang mulu bengko. Mamatua kasi inga deng dia pung laki ko jang baomong kalo sonde tau. Ama Tobo sonde tarima. Bapatua deng mamatua langsung basambung mulu su. Dong dua tar tau kalo dong pung katua RT ada badiri di muka pintu ko lia dong dua. Bapatua ada mo datang kas tau kalo dong dua pung nama sonde maso dalam daftar yang tarima baras raskin. Karna tar tahan lia dong dua batangkar, bapatua eRTe langsung pange dari luar.

"Pagi Ama Tobo. Pagi Ina. Beta ada parlu sadiki ni. Beta mo datang kas tau ama deng ina, kalo ama deng ina pung nama sonde ada di dalam daftar yang tarima baras raskin. Ma beta datang dapa lia ama deng ina ada batangkar," Katua RT baomong dari luar

Ama Tobo deng dia pung bini langsung tutu ame mulu memang. Dong dua baku lia memang. Ada batangkar tantang raskin, tarnyata dong sonde bisa dapa lai. "Na karmana su, kotong tar dapa raskin lai. Ma beta dapa baca di koran kalo kotong pung bapa wali ada mo utus orang pi Jakarta ko perjuangkan kasi nae jumlah yang tarima baras raskin. Moga-moga bisa dapa tambus, kalo su bagitu kan ena, dapa baras garatis lai," Ama Tobo kasi tanang dia pung bini sambil malerok dia pi katua RT.