POS KUPANG.COM, AMA Tobo geleng-geleng kapala waktu dengar itu orang dong carita bilang ada satu bos dapa hukuman dua taon penjara. Hakim sese itu bos di penjara karna ceke munta doi negara. Mangkali mulut son bisa tahan, Ama Tobo ju langsung sambong. “Ko dong ju sala na. Coba ceke doi tu hitong-hitong sadiki na bae. Ini sonde. Ceke abis dulu baru dudu hitong. Makanya begini to.”

Laklaki omong ma dia pung tangan ame laru trus. Bagitu ame, itu laru tu laklaki hopo kas abis. Baitua tu paleng suka kalo omong masala sambel tap laru. Dia pung enak tu lebe dar daging se’i yang dong jual di warung-warung.

“Jang bagitu bu. Kalo minom mabok nanti omong tasala karmana? Lebe bae omong ini barang ni ta usa pancing pake laru. Son pake laru ju kotong omong enak. Ato karmana bu dong?” Minggus yang su flai pancing sang Ama Tobo deng Metu yang ada ba tos dong glas laru.

Dasarnya su flai, Ama Tobo ju langsung sambar. “Suda lai bu. Lanjut sa. Ko kotong omong ni batul ko. Dulu dong ceke munta doi tu pake hitong? Sonde kan? Makanya, kalo su bagini ni kotong lapis trus biar tau rasa,” laklaki tapa enak pung andia dia pung bini, Ina Feok jadi taku.

Dengar bagitu, Metu katawa sa. Ko laklaki ju satuju na. “Itu batul adi. Ma omong tu musti hat-hati sadiki e, supaya aman. Jang sampe kotong ju omong son pake otak, andia bagitu dong tuntut kotong keok,” laklaki omong sama ke toko agama.

Mangkali su son tahan lai, Minggus ju sambong. “Makanya, skarang ni kotong musti pake otak, pake hati. Kalo dua ni kotong son pake, bagini su. Su maso pangadilan baru kotong takuju. Makanya, pikiran, perkataan deng parbuatan musti sejalan. Kalo sonde, paya,” laklaki omong abis itu kas abis dia pung laru. Bagitu laru abis, laklaki bangun pulang son pake parmisi. Ko su mabok brat na...