Dapa Doi

POS-KUPANG.COM, -- MATHARI su mo terbenam ma Bai Ndu tetap duduk di samping rumah ko bacarita deng tetangga. Ini hari dong rame bacarita soal ana-ana sakolah yang dapa uang sakolah gratis.

Ada asyik carita te Ina Feok muncul dari muka deng mulut komat-kamit sama ke ada maale siri pinang.

“Su mo galap ini basong masi dudu buat apa lai o. Ini hari katong pung wilayah giliran listrik mati jadi lebe bae pulang ko liat lampu palita ko apa ko,”   
Ina Feok mangomel dia pung laki yang su dar habis makan siang su ilang. Tau-tau baitua ada dudu bacarita deng tetangga di Bai Ndu pung rumah.
“Katong ni lagi omong ana-ana pung nasib karna dong pung skolah ada dapat doi. Cuma kotong son tau itu tu uang apa, te ana dong ju kastau son jelas,” Bai Ndu jawab Ina Feok.

Dengar bagitu, Ina Feok pi duduk dekat dia pung laki ko dong bacarita trus. “Dar tadi beta ni dengar bosong bilang skola gratis. Itu tu sama deng beasiswa. Yang tarima itu tu ana-ana yang hidup susa dong. Makanya tadi beta ju pi urus di sakolah,” Ama Tobo mulai angka bicara. Ama Tobo yang dari tadi diam langsung buat suasana tenang.

“Itu yang tadi beta mo bilang hanya lupa karna kotong pung tetangga banyak yang bilang dong pung ana dapat itu doi. Dong ju bilang orang tua yang pi urus ma andia katong ju masih bingung, te beta dengar pameranta dong ju son tau itu beasiswa dari mana lobang,” Bai Ndu sambung deng dia pung.