SKARANG in kandidat calon walikota dong su mulai  kampanye deng bajual dong pung visi-misi deng dong pung program. Biar ko masarakat bisa tau apa nanti dong mau bekin  apa kalo dong su tarpili jadi walikota dan wakil walikota Kupang.

Bai Ndu dudu sambil makan ubi rebus deng kopi panas sambil angka naek kaki tinggi-tinggi di atas teras di dia pung muka ruma.

Dia tau kalo skarang tensi politik di Kot Kupang bukan cum panas tapi su manyala makamiung  mati pung. "Son apa-apa in namanya demokrasi. Kalo dalam satu ruma istri pili dia pung jago si C, dia pung suami pili dia pung calon si B dan dia pung anak lebe suka pili calon walikota si A, it namanya sah sah saja. Wajar sa, karna bapa son bisa paksa anak untuk pili dia pung jagoan, juga mama son bisa paksa dia pung suami ko pili dia pung calon walikota yang dia anggap paleng top. Yang penting calon jang baku gigit waktu kampanye lalu satu mulai kas jelek figur yang laen. Silakan jual program yang mau dibuat jika nanti jadi walikota," kata Kat Ina Feok.

Bai Ndu yang dengar kalo Ina Feok su sambar dia pung baomong ko dia langsung bekin pembicaraan agak fals sadiki. "Ya........., biar suami istri dong dua su dikukuhkan jadi satu adanya dalam perkawinan tapi untuk pilian bole beda. Di atas tampat tidor bole jadi satu tapi pilian politik  bole beda dan son harus satu  pilian," kata Bai Ndu.

Ina Faeok pung takuju laiiiiiii. "Awiiii..... lu katong bomong soal satu pilian politik calon walikota antar suami-istri tapi lu tamba satu tampa tidor ato satu tubu/badan tapi pilian bole beda. "Weeee.... lu jang talalu porno dolo. Tolong ko jaga ama it mulu bae-bae jang samua lu taro deng bahasa yang falssss sa....," kata Ina Feok kas inga sam Bai Ndu.

Buka bagitu....... nyora, tapi bet cum mau kas inga kalo baomong soal politik it jang talalu sarius. Inga politik itu ibarat kawin hari ini besok bisa cerai karna itu sifatnya kawin politik atu kawin-kawinan untuk capai tujuan dan kepentingan.

Bai Ndu ju kas inga sam Ina Feok kalo nanti dia pili calon walikota di Tempat Pemungutan Suara ato Te Pe eS ko jang sala pili orang.

"Cari ame itu figur yang bae..... yang bisa kas maju dan melanjutkan pembangunan in  Kota Kupang. Cari calon yang bisa bekin in  wajah kota lebe bae karna sapa pun dia yang jadi walikota samua ada aturan maen dan mekanisme di pemerinta. Untuk bangun son bisa sama ke maen sulap.  Samua tantu butu waktu dan ada proses son bisa sim sala bim adakadabra langsung in kota jadi bae ato masarakat tiba-tiba jadi sejahtera. Samua  harus karja karas bae pemerinta  dan yang utama masarakat mau karja lebe keras ko dia pung kehidupan  lebe baeeee.... laiiii...," kata Bai Ndu.

Ina Feok yang lita Bai Ndu bamong deng sarius dia pi cubit ame Bai Ndu pung paha. "Omong politik tu santai sa son usa talalu sarius karna sapa pun yang jadi walikota katong tetap masarakat biasa yang besok harus pikir ame beras di karung nilon ada ko sonde ko biar in  pariuk bisa ada nasi. Kecuali kalo si A jadi walikota beta ju jadi direktur ato komisaris perusahan daerah na neoooo pi," kata Ina Feok kas inga sam Bai Ndu. (ferry ndoen)