Pinjam Doi Do

PAGI-PAGI, Minggus su pi stor muka di Ama Tobo pung ruma. Laklaki datang deng pakean necis. Pake kaen timor yang masi bae, baju tangan panjang, lengkap deng sendal jepit.

Bagitu lewat deker satu, Metu pung bini, Taroci ada baganggu. Biar bagitu, laklaki cuma diam sa. Laklaki jalan lurus pi di Ama Tobo pung ruma.

Bagitu sampe, laklaki ketok pintu muka. "Bu, mat pagi. Bosong ada bekin apa," laklaki panggel dar depan.

Dengar bagitu, Ama Tobo pung bini, Ina Feok, pi buka pintu. "Bu ni, putar lewat balakang sa. Bu ni sama ke tamu agung darmana ko. Putar dar balakang lebe bae," maitua buka pintu sambel mangomel.

Bagitu maso, baitua langsung jalan pi balakang. Liat Ama Tobo ada kas barisi dia pung jerigen laru, baitua ju langsung ame posisi ko dudu dekat situ. "Bu jang mara te beta ada parlu," Minggus omong pake bisik.

"Bu bisa tolong ko, kas pinjam doi sadiki do. Nanti besok orang kas kambali beta pung doi, baru beta datang antar pulang bu pung doi," baitua mondor sadiki baru omong.

Dengar bagitu, Ama Tobo katawa sa. Ko laklaki ju son ada doi na. "Bu ni sama ke son tau beta sa. Beta mo rogo doi darmana lobang. Bu tau beta to. Kalo ada beta kasi, kalo son ada mo karmana," baitua omong lurus sa.

Mangkali dengar itu laklaki dua baomong, Ina Feok langsung sambar. "Hemmmm, mulai su. Kira beta son dengar na," maitua mulai boto-boto. Ais itu Ina Feok bangun ko jalan manuju itu laklaki dua.

"Mo pinjam doi bekin apa? Kalo bu butu doi, pi karja to. Paleng gampang jadi ojek. Lebe gampang lai pi di tim sukses dong. Kalo bu bisa lebe barani sadiki, langsung kastau di bos-bos dong sa. Dong tu ada butu kotong, andia kalo kotong minta, pasti dong kasi," Ina Feok kasi jalan kaluar.

"Itu ju bae usi, ma nanti dong bilang apa?" Minggus kasi alasan.

"Tinggal bu putar sang dong to. Bu kan jago putar. Kalo bu bisa ator bermaen sang dong, bu dapa doi banya," Ina Feok kasi tantangan lai.

"Usi ni, nanti orang dong bilang beta putar balek e. Cuma bagini usi, be pung anak kan ada kana DeBeDe, andia masi di ruma saki. Skarang be mo pinjam doi ko tebus obat. Obat mahal na," Minggus mulai curhat.

Dengar baitua pung isi hati, mamatua ju son sambong lai. Maitua langsung bale balakang ko maso kamar. Bagitu kaluar, maitua kasi amplop satu. "Ini son banya. Nanti dapa doi baru kas kambali," maitua omong plan-plan.

Ma abis itu, Ina Feok ajar lai Minggus. Bosong musti rajin karja. Kalo rajin pasti doi banya. Ma kalo cuma urus minom mabok, bosong mo jadi apa? Skarang ni lagi susa, bosong musti karja sunggu-sunggu," maitua ajar satu-satu ais tu langsung pi dapur ko bamasak.

Ama Tobo yang ada dudu di situ ju diam sa. Baitua urus trus dia pung jergen laru yang su ampa lima hari son perna kas barisi. "Skarang ni beta jual laru pake mok. Satu mok seribu. Kalo sapulu mok, sapulu ribu. Ini doi ni beta pi kasi di koperasi ko dong yang ator. Sapa tau, beta jual laru bisa beli motor," Ama Tobo mangayal ko dia pung bini katawa."  (maxi marho)