Pung Banya Lai

SAKARANG ni parte pung banya lai. Karna talalu banya, andia beta ni son bisa hafal satu-satu. Coba pemerenta dong kas kurang sadiki hang, kalo sonde, beta ni bingung liat parte-parte dong. Jangankan kanal itu parte bu, hafal sa son bisa na.

Minggus yang ada dudu pokrol deng Metu di Ama Tobo pung pak laru situ, mulai ulas sana sini manyangkut parte yang talalu banya. "Yang beta son mangarti tu, kanapa pemerenta dong kas isin waktu orang dong mo bekin parte? Padhal parte tamba banya, pemerenta tamba pusing," Minggus mas sambong lai dia pung kalimat.

Baitua ju omong tamba enak. Ko dong minom mabok dar tadi na, andia mulut son bisa barenti sadiki ju. Metu yang ada dudu di sebla situ ju rajin mati ame tolakan ko hopo deng laru. Ko se'i pung enak bekin lida dong son bisa barenti bagoyang na.

"Bu, bosong ju sala. Skarang ni bukan cuma parte yang banya. Organisasi yang orang dong bentuk mo pemilu kada ju tamba banya. Ko kamaren dulu ni, kotong pung keluarga satu pi bentu proda ko apa ko, bilang itu tu kotong pung organisai," Ama Tobo kasi info baru.

"Proda apa lai bu. Lama-lama Promo ju jadi nama organisisa. Kalo proda tu bosong pung, na promo tu kotong pung," Metu ju ambel deng lucu, andia dong tiga katawa sama-sama.

Lagi katawa pe'e gigi, takuju Minggus ame piring yang ada ponu deng se'i ko sorong pi di Ama Tobo. Baitua ju ame sa. Ko laklaki pung muka su kram bagitu, mana baitua mo liat lai, itu tu sei su goreng ko belom.

"Suda la bu. Darpada kotong iko orang pung organisisa, lebe bae kotong tiga bikin kotong pung," Metu kasi usul. Mangkali otak su son jalas, baitua pung cara omong ju su mulai tabolak balek.

Dengar Metu pung usul, Minggus ju satuju. Ama Tobo ju sama. "Kalo bagitu kotong kasi nama Mimeto, yang artinya Minggus, Metu deng Ama Tobo. Nanti bu jadi katua, beta wakil, trus adi jadi bendahara,"  Minggus yang tacoro ko angkat dia pung diri jadi wakil.

"Itu ju bae. Ma kalo bisa, jadi katua tu satu-satu putaran sa. Trus putaran berikut, beta jadi ketua trus bu lai. Na tugas ketua tu urus laru. Wakil tu ator tukang po'a. Trus bendahara tu ator tolakan. Kalo kotong tiga ni jalan, lam-lama jadi enak," Metu tamba deng dia pung andia dong omong su tamba rame. Apalai Taroci deng Ina Feok ju su datang ko lima dudu sam-sama.

Dengar Metu omong bagitu, Ina Feok deng Taroci ju langsung tanya. Trus kotong dua ni jadi apa? Kotong jadi bosong pung pambantu? Pung enak lai. Kalo bisa kotong dua jadi sekertaris sa. Kan urus tulis-tulis to. Bosong beli laru barapa kali, barapa jergen, tolakan karmana. Trus kotong dua sandiri dapa apa? Itu yang boson musti ingat," itu parampuan dua su mulai foe.

Karna omong tamba enak, andia hari su galap ju dong son rasa. Lam-lama akirnya dong bubar ko Ama Tobo langsung kas makan kambing, trus Minggus deng Metu tabanting di tampa.